LAOAG CITY – Desidido ti pamilya dagiti dua a barito a mangipila ti kaso kontra kenni Police Master Sergeant Onofre Pacis iti PNP-Vintar kalpasan a maipagarop a dinangran na dagiti nasao a menor de edad iti paset ti Barangay 8, Margaay iti nasao nga ili.
Nabigbig dagit dua a biktima a da Henson Pailma ken Jhan Ayron Ponce, agpada a residente iti Barangay 1 iti nasao nga ili.
Segun kenni Mrs. Joralyn Pailma, saan da a kayat ti paareglo ken kalikagom da nga ikkan daytoy ti leksyon iti maipagarop a panangdangran na kadagiti biktima.
Inpetteng na a kas maysa a pulis ket ni kuma pay Pacis ti aganawa no adda man ti inaramid dagiti biktima a saan a nasayaat.
Inlawlawag na nga idi adda da iti RHU iti nasao nga ili ket saan a nagsasao ni Pacis ken kunana a nakainom ti nasanger ti nadakamat a pulis.
Ummuna iti daytoy, inlawlawag ni Jhan Ayron Ponce a bayat nga aggi-innangaw da kadagiti barkada na ket naisawang na ti “I love you” ken eksakto met a lumabas ti anak ni Pacis a nakamotorsiklo ken lubbon na ti nobya na.
Naamoan nga inpagarop ni anak ni Pacis a ti nobya na ti nangibagaan ni Ponce ti “I love you” rason a nagsubli iti ayan dagiti biktima ken napan nagayab ti barkada na a basketball player ken ditoy a pinunggos na ti bado ti biktima.
Kuna met ni Henson nga idi napan ni Pacis iti ayan da ket maipagarop nga inulod-ulod ti pulis isuda ken adda pay ti sumasaruno a patrol car iti nasao a pulisya ngem inpetteng na a saan a naganawa dagiti nakalugan.
Malaksid iti daytoy, kuna ni Henson a dinamag pay ni Pacis ti nagan na ken maipagarop a pinarusukan na rason a natulid, ken adda pay ti nangtulpak kenkuana a binigbig na a Ted Dalere.
Saan met nga ammo ni Henson no apay nga inaramid ni Pacis kenkuana daytoy gapo ta saan da met nga inan-ano ti anak na.
Kabayatanna, inpetteng ni Police Staff Seragent Daryll Magbual, imbestigador ti PNP-Vintar a naka-off duty ni Pacis idi napasamak ti maipagarop a panagdangran.
Innayon na a no naimatangan da ti pasamak ket dagus da kuma a naganawa.
Naglikudan met ni Dalere a karaman isuna a nakipagdangran kadagiti nasao a barito.
