LAOAG CITY – Saan nga inaprubaran ti International Criminal Court (ICC) ti personal nga ibibisita dagiti kameng ti pamilya ni dati a Presidente Rodrigo Duterte kabayatan ti panangiyuswat ti korte ti confirmation of charges hearings ita a lawas.
Daytoy ket maibasar iti inparuk-at nga statement ti pamilya Duterte.
Nupay kasta, maipalubos ti panagtawag ti telepono dagiti miembro ti pamilya ni dati a Presidente Duterte.
Basar iti pamilya Duterte, innem dagiti abogado ti dati a presidente nga agatendar kadagiti panagdengngeg tapno masigurado a naurnus ken napintas ti pannakaipresentar na babaen ti Filipino legal team.
Karaman dagiti abogado a mangibagi ken ni dati a Presidente Duterte ket isuda Salvador Medialdea; Martin Delgra III; Silvestre Bello III; Alfredo Lim Jr.; Caesar Dulay ken ni Salvador Panelo.
Nagyaman ti pamilya Duterte iti legal team para iti agtultuloy a dedikasyon ken professionalism da kabayatan ti ibilang da a kritikal nga oras ti dati a presidente.
Ti confirmation of charges hearings ket naka-schedule mangrugi ita nga aldaw ti Lunes, Pebrero 23 agingga intono Pebrero 27 ita a tawen.
Basar iti ICC website, maisayangkat dagiti sessions manipod iti oras ti alas-singko ti malem agingga iti alas-dyes ti rabii iti Pre-Trial Chamber I iti Courtroom I.
Ni Duterte ket agdama a nakabalud iti Scheveningen Prison, a dati a maaw-awagan ti Hague Penitentiary Institution, gapu iti crimes against humanity nga adda ti pakainaigan ti kampanya kontra illegal a droga ti dati nga administrasyon.
Rimuar iti rekord ti gobierno a nasurok nga 6 a ribo a drug suspects ti napapatay kadagiti insayangkat nga operasyon ti Philippine National Police, ngem iti patta-patta ti Human Rights Groups ket umab-abot iti 30,000 dagiti pimmusay gapu ta maipagarop nga ado dagiti saan a naireport a kaso.
