LAOAG CITY – Naragsak ni Mrs. Luzviminda Jacinto, agtagikua ti life-size nga imahe ti Black Nazarene iti Brgy 2 ditoy siudad ti Laoag gapu ti panagdayo dagiti turista a naggapu iti sabali a probinsya.
Kuna na a dagiti turista ket naggapu iti probinsya ti La Union, Cagayan, ken Isabela.
Segun kenni Mrs. Jacinto, inpaayan na met iti taraon dagiti bisita iti pammigat, pangaldaw ken pangrabii nga umay mangkita kenni Black Nazarene.
Mamati ni Mrs. Jacinto ti dakkel a naitulong kenkuana iti namarsua gapu ta pinagimbag na dagiti sinagaba na a sakit ken dagiti miembro ti pamilya na rason a dakkel ti panagyaman na iti namarsua.
Umaboten iti 15 a tawen nga adda kenkuana ti Black Nazarene idinto a pito a tawen metten iti panangiwayat na ti panaglibot iti tunggal Enero 9 wenno Traslacion ti Black Nazarene.
Innayon na a saan a naggasto ti adu a kuarta idi paskua ken baro a tawen ken ditoy iti nangibusbusan na ti kuarta para kadagiti umay mangkita iti imahe ni Nazareno kasta met panagyaman na kenkuana.
