LAOAG CITY – Agtultuloy ti imbestigasyon dagiti kameng ti PNP-Laoag seknan iti pannakapalto-paltog ti maysa a pagtaengan iti Barangay 43, Cavit ditoy ciudad ti Laoag.
Nabigbig ti agtagikua iti pagtaengan a ni Oscar Pingol Lopez, residente iti nadakamat a barangay.
Segun kenni Lopez, bayat a matmaturog iti salas ti pagtaengan da ken iti agarop 1:20 itay parbangon ket nakariing gapo kadagiti sumagmamano a putok ti paltog rason ti panagikkis ken dagus a bimmangon.
Inlawlawag na nga iti panagsirip na tawa ket nakita na dagiti nakamotorsiklo a dagus a pimmanaw manipud iti nasao a lugar.
Kunana a saan na a nalasin dagitoy gapo ta naasipnget iti sangwanan ti pagtaengan da.
Kalpasan daytoy, nakita da nga adda ti abot iti tawa da ken timmama pay ti bala iti ridaw da.
Gapo iti daytoy, dagus da a nagreport iti kayong na a konsehal ken inpadanon da iti biang ti Philippine National Police.
Kunana nga awan ti ammo na a rason no apay a palto-paltogan dagiti suspek ti pagtaengan da gapo ta awan met ti kariri ti pamilya da.
Mainaig iti daytoy, inbatad ti anak ni Lopez a ni Shela Mae a basar iti CCTV footage ket dua a lallaki ti nagpalto-paltog iti pagtaengan da.
Dinakamat na a naala iti CCTV ti plate number ti motorsiklo ngem blur ken agmaris ti nalabbaga ti motorsiklo.
Kabayatanna, narekobredagiti kameng ti SOCO innem a fired cartridge case ken maysa a deformed bullet.
