LAOAG CITY – Napalaos ti ragsak ti pamilia Marcos iti panangidaulo ni dati a senador Ferdinand Bongbong Marcos Jr. iti unofficial ken partial result ti presidential race.
Daytoy ket kageddan ti pormal a panangiproklamar ti COMELEC province ditoy Ilocos Norte idi kalman ti panangabak dagiti baro nga opisyal nga agserbi ditoy probinsya.
Iti governatorial position, opisyal nga naiproklamar ti panangabak ni imcumbent Gov. Matthew Marcos Manotoc kontra iti kinalaban na a ni dati a Cong. Rudy Fariñas.
Presente met iti proklamasyon ti ina ti gobernador a ni Senador Imee Marcos.
Segun ken ni Manotoc, dakkel a pammadayaw ti pannakapili na manen kas gobernador nga agserbi ditoy probinsya.
Mainaig iti daytoy, kuna na a nakaawat ti congratulatory message manipod iti kinalaban na a ni dati a congressman Fariñas ken nagyaman daytoy.
Innayun na a nangipatulod ti mensahe ken ni Laoag City Michael Marcos Keon kalpasan a nangabak ditoy siudad ken mangnamnama a kageddan ti panagleppas ti eleksyon ket maurnos iti aniaman a saan a panagkikinnaawatan iti uneg ti pamiliada.
Paset ti panagsarita ni Gov. Matthew Marcos Manotoc.
Makaksid iti governatorial position ket pormal met a naiproklama babaen iti COMELEC ti panangabak ti anak ni presidential bet Bongbong Marcos ken Congressman-elect Sandro Marcos iti primero ditsrito kontra iti kinalaban na a ni imcumbent Cong. Ria Fariñas, anak ni dati a congressman Fariñas.
Kuna ni Marcos napalaos ti panagyaman na kadagiti agtultuloy a mangsupsuporta kenkuana.
Inbatad na a napateg kenkuana ti panangabak na gapu ta isu ti kaunaan a gundaway nga adda ti nagpaidasig a diputado iti pamiliada.
Mainaig iti daytoy, inbaga ni Marcos nga ado ti plano ket kalikagum na nga aramiden para iti probinsya ken ti panangabak na ti rugi pay laeng ti serbisyo na iti publiko.
Immunan nga agpada a kinablaawan ni Gov. Manotoc ken ni Sandro ni BBM kageddan ti panagyaman da kadagiti agtultuloy a sumupsuporta.
Mamati ni Sandro a maawatan ti publiko ti mensahe iti panagkaykaysa nga isu ti kangrunaan nga ilablaban ti ama na ken isu ti rason nga adda iti umuna a pwesto iti manarimaan a laban na.
Immunan a nangipaay ti mensahe si Laoag City Mayor Michael Marcos Keon, kasinsin ni Presidential Candidate Marcos Jr. ken inbaga na nga ipaay na ti sibubukel a suporta na iti daytoy iti laksid nga adda ti saan a panagkikinnaawatan iti uneg ti pamiliada.
