LAOAG CITY – Respetaren ti pamilya ni PO3 Omar Nacionales, taga Barangay Escoda, Marcos, Ilocos Norte ken maysa kadagiti natay a SAF-44 ti nagbalin a desisyon ti Sandiganbayan.
Daytoy ket mainaig iti panangibasura ti Sandiganbayan iti naipila a kaso kontra kadagiti dati a nangangato nga opisyal ti PNP a nangidaulo iti kontrobersiyal nga Oplan Exodus a nagresulta iti Mamasapano massacre iti babaen ti administrasyon ni dati a Presidente Benigno Aquino III idi January 25, 2015.
Iti interview ti Bombo Radyo Laoag ken ni Patrolman Ezar Agacer Nacionales, nakaassign iti PNP-Batac ngem residente iti Barangay Escoda, Marcos, Ilocos Norte ken kabsat ni Omar Nacionales, inbatad na a respetaren na ti nagbalin a desisyon ti sandiganbayan gapu ta agtalek da ti justice system ditoy pagilyan.
Innayon na nga ikarkararag da lattan a rumuar to met laeng ti kinapudno ken madusa dagiti rumbeng a madusa.
Mainaig iti daytoy, mangnamnama ti pamilya Nacionales a maikkan to met laeng ti hustisya ti pannakatay ni Omar Nacionales ken dadduma pay a miyembro ti naawagan ti SAF-44.
Kabayatanna, inrakurak ni Patrolman Nacionales nga intono Enero 25 nga anibersaryo ti masaker ken mapan da makipagpaset iti wreath laying ceremony a maisayangkat iti nakaitabunan ti kabsat na idiay La Union nga isu ti nakaikamangan ti pimmusay a kabsat na.
