LAOAG CITY – Emosyunal ti pamilya ni Police Gen. Benjamin Acorda iti Barangay 3 iti ili ti Bacarra iti pannakadutok kenkuana kas baro a PNP Chief kasukat ni retired Police General Rodolfo Azurin Jr.
Segun kenni Mr. Francisco Acorda Tangongan, ti uliteg ni Gen. Acorda, napalaos ti ragsak da idi naamoan da a daytoy ti baro a mangidaulo iti nailyan a pulisya.
Inbatad na a sipud ubing ket arapaapen ni Gen. Acorda ti agbalin a maysa a pulis ken ti pimmusay nga abogado nga ama na ti nagbalin nga inspirasyon na.
Inbatad na a naggapo ti rigat ti pamilya ni Gen. Acorda ngem gapo iti determinasyon ket nagun-od na ti arapaap na nga agbalin a maysa a pulis.
Kunana nga awan pay ti nakairamramanan ni Gen. Acorda nga anyaman a madi sipud nagubing agpapan ita gapo ta nakatutok iti panagbasa ken panagserbi iti pagilyan.
Indiskribir na pay ni Gen. Acorda ket maysa a nasingpet ken kabsat ken dimmakel a natudyo nangruna kadagiti nagannak kenkuana.
Kabayatanna, nagyaman met daytoy kenni Pres. Ferdinand Bongbong Marcos Jr. iti talek nga inpaay na kenni Acorda.
Mangnamnama met ni Mr. Tangonan nga iti panagbalin a baro nga hepe ti nailyan a pulisya ni Gen. Acorda ket ad-adda pay a tumalna ti pagilyan.
