LAOAG CITY – Nagbalin a rangtay ti Bombo Radyo Laoag tapno maidanun ti tulong nga inted ti Global Save Life Foundation a nakabase iti Vienna, Austria para kadagiti agassawa a taga Brgy. Araniw ditoy siudad ti Laoag.
Napalaos ti panagyaman da Mr. and Mrs. James Ramirez iti nangipaay ti tulong kadakuada.
Naamuan ni Bombo Radyo Laoag a dagiti agassawa ket addaan da ti rangkap ti bagi wenno saan a makakita ni Mr. Ramirez idinto a saan met a makakita ti akinkannawan a mata ni Mrs. Ramirez ken ti anak da nga nga 11 months ket addaan ti katarata.
Kuna na a nangeg na iti Bombo Radyo ti interview kenni Mr. Elmer Blanco iti Vienna, Austria seknan ti sitwasyon ti COVID-19 idi ta ginutigot ni Blanco ti publiko a no siasinno ti agkasapulan ti tulong ket nakasagana da mangipaay.
Gapu iti daytoy, kinontak ti anak ni Mr. Ramirez nga adda idiay Manila ti foundation ket dita a napatgan ti kiddaw na a tulong.
Nakaawat da Mr. Ramirez kadagiti grocery item agraman ti dua a sako ti bagas nga sag-25 a kilos.
Kabayatanna, inpakaammo ni Ramirez a walo a tawenen nga agserserbi a masahista iti laoag International Airport.
Nagyaman met ni Mrs. Ramirez iti namarsua ken ti mangidadaulo iti foundation iti inted na a tulong bayat ti COVID-19 pandemic.
Nagkiddaw manen ni Mrs. Ramirez kadagiti kayat na ti tumulong iti anak da nga 11 months para ti pannakaikkat ti katarata dagiti dua a mata na.
