LAOAG CITY – Inpetteng ti pamilya ti mapukpukaw a lalaki a ni Albert Pitpit, agtawen ti 37, maysa a mannalon ken residente ti Brgy. Nagpatayan iti ili ti Banna a saan daytoy ti bangkay a nabirukan iti waig ti Brgy. 57 Pila ditoy Siudad ti Laoag.
Daytoy ket kalpasan a nagkamang da iti PNP Laoag tapno kitaen ken kumpirmaren da ti mapukpukaw a kabagianda.
Segun ken ni Bonifacio Pitpit, agtawen ti 62, ama ni Albert, saanna a baro ti bangkay a nabirukan iti waig gapu ta adayo iti bagi ti anakna maidasig iti bangkay.
Inbatadna nga awan ti bado ken short pants ti barona kas ti nakasuot iti bangkay.
Inpakaammo ni Bonifacio, sipod idi nagawid ti barona iti pagtaenganda manipod idiay Cagayan ket nagbaliw ti garaw ti barona gapu ta masansan daytoy a mabutbuteng a maipagarup nga adda kasla mangbanbantay kenkuana.
Inpalgakna nga awan ti nasayaat a panunot ti anak na idi naudi da a nakita gapu ta adda impluwensiya daytoy ti nasanger.
Inpagunamgunam ni Bonifacio napanda metten kadagiti lugar a mabalin a papanan ti barona ngem napaay da.
Inyebkasna nga awan pulos komunikasionda ti anak na sipod nagpukaw daytoy.
Innayon ni Pitpit a nakarwat ti baro na iti puraw a t-shirt ken blue iti likodna nga addaan ti litrato a baboy.
Naudida a nakita daytoy idi Lunes, Enero 6 agarup iti oras ti ala sais agingga alas syete ti rabii (6-7pm).
Kabayatanna, inpakaammo ni Chief Master Sergeant Sean Francis Bugaoisan ti PNP Laoag a naitabonen ti bangkay a nabirukan ditoy Siudad ti Laoag iti Catholic Cemetery.
