LAOAG CITY – Napalaos ti ragsak ti pamilya ni Mr. Gelienor “Jimmy” Pacheco, ti caregiver idiay Israel akalpasan a maysa daytoy kadagiti winaya-wayaan ti militante nga Hamas.
Segun kenni Mrs. Jellina Pacheco Gamiao, ti ikit ni Pacheco a residente iti Barangay Cabayo iti ili ti Vintar, naamoan na daytoy manipud iti asawa ni Pacheco a maysa daytoy kadagiti nawayaan nga hostages.
Inbatad na a nalag-anan ti marikrina na kalpasan a nadamag na nga addan iti nasayaat a kondisyon ni Pacecho ken agrekrekobre iti ospital idiay Israel.
Linagip na pay ti sakit a narikna na idi naamoan da a maysa ni Pacheco kadagiti innala ti Hamas idi rimmaot da iti Israel.
Kabayatanna, kuna met ni Mrs. Realyn Gamiao, ti ipag ni Pacheco nga uray awan ti kasiguradoan ti kasasaad idi ni Pacheco ken saan na a naawanan ti namnama ken kanayon ti panagkararag da.
Kabayatanna, tawen 2018 idi nagturong idiay Israel ni Pacheco ken nagbakasyon laeng iti Pilipinas idi Mayo kalpasan a pimmusay ti kasinsin na.
