LAOAG CITY – Desidido dagiti nagannak ti ubing a dinangran ti maysa a mangisursuro iti Paoay Faith Academy iti ili a Paoay a mangipila ti reklamo kontra kenkuana.
Daytoy ket kalpasan a naminpat a kiniddel ti mangisursuro iti nasao a pagadalan a ni Ms. Deborah Eclarin, School Supervisor ken Tutorial Teacherti ubing gapu ta saan na a masursurutan dagiti isursurona kenkuana.
Segun ti Lola ti ubing a ni Romalyn Dafun, desidido da a mangipila ti reklamo kontra iti mangisursuro iti aniaman ti mapasamak.
Inbatad ti pamilya Dafun a saanda a palabsen ti napasamak iti apoko na gapu ta uray nagpakawan ti nasao a mangisursuro ket saanna pulos a narikna ti kinasinsero ti panagpakawan na.
Immun-unan iti daytoy, nagkamang ti Lola ti ubing iti Department of Education-Ilocos Norte tapno ipakaammo ti napasamak iti Apoko na.
Inlawlawag met ti Schools Division Superintendent ti DepEd-Ilocos Norte a ni Dr. Joann Corpuz a saan da a maikari a matulunganda ti maseknan gapu ta saan da a poder ti pribado a pagadalan no maipanggep ti kastoy a pasamak malaksid laeng no mainaig iti kurikulum a maisursuro kadagiti ubbing.
Kinanunungan met ni Mr. Santiago Baoec, ti pannakangiwat ken DepEd-Ilocos Norte Education Program Supervisor ti nagbalin a rakurak ni Corpuz.
Kabayatanna, inpakaammo ni Atty. Marshall Ellis Diego, Legal Officer ti DepEd-Ilocos Norte a mabalin a sumango ti nasao a mangisursuro ti kaso nga Administratibo ken Child Abuse.
