LAOAG CITY – Inlawlawag ni Ms. Karen Ventura iti Barangay Casili ditoy ciudad ti Laoag a saan da a maibaga a ti bakuna kontra covid-19 ti kangrunaan a rason ti nakatayan ti kabsat na a maysa a Barangay Service Point Officer (BPSO) nga agtawen ti 31.
Segun kenni Ventura, nabakunaan ti kabsat na idi Mayo 20 ken idi laeng Biyernes wenno maikawalo nga aldaw kalpasan a nagbakuna ket naglammin ti maseknan.
Inbatad na nga idi nalpas a nabakunaan ket nagsakit ti ulo ti kabsat na rason a nagtumar ti agas ken iti sumaruno nga aldaw ket napan pay laeng nagtrabaho kas BSPO.
Nupay kasta, iti bigat ti Biyernes ket naglammin ken nagid-idda ken iti parbangon ti Sabado ket nakapasar ti LBM ken nagvomit ken naitaray iti ospital iti kamalman na.
Kunana a namitlo da nga intaray iti ospital ti kabsat na ken ditoyen a pimmusay.
Ummuna iti daytoy, kunana nga idi nagkapsot ti kabsat na ket adda pay ti gundaway a naglitem ti ima na rason nga inpilit da a napan iti ospital.
Dinakamat na nga iti ummuna a gundaway a naipan iti ospital ti kabsat na ket inbaga ti doktor a nangato ti sugar level daytoy ken adda ti UTI na, naresetaan ti agas ken napagawid met laeng ngem naisubli iti ospital gapo iti panagkapsot na.
