LAOAG CITY – Inbatad ni Police Captain Chris Anthony Sorsano, chief of police ti PNP-Currimao nga awan ti pakainaigan na iti eleksyon ti napasamak a pammaltog iti Barangay San Simeon iti nasao nga ili.
Binigbig ni Sorsano ti biktima a ni Michael Jude Balanay, agtawen ti 32, naasawaan, maysa a mannalon ken residente iti Barangay Burayoc iti ciudad ti Batac.
Segun kenni Sorsano, itay parbangon ket nakaawat da ti tawag manipud iti PNP-Batac no sadinno ket nagresponde da iti nasao a pammaltog ken ti biktima ket intaray da iti Mariano Marcos Memorial Hospital and Medical Center.
Gapo iti daytoy ket dagus da met a nagturong iti nakapasamakan ti insidente ken nagimbestigar.
Kunana nga iti inisyal nga imbestigasyon da, napan ti biktima iti maysa a convenience store ken rumrumuar nga adda ti nakariri na.
Kalpasan daytoy, inbatad na nga idi agawid ti biktima ket maipagarop nga adda ti nangsurot kenkuana ken pinaltogan da daytoy a puon ti panagsagana na ti maysa a tama ti paltog iti likod na.
Mainaig iti daytoy, naamoan a sakbay a naiserrek iti operating room ti biktima ket nakasarita pay laeng dagiti pulis no sadinno, naibaga na a nakamotorsiklo ti nangsurot kenkuana ken no makita na dagiti suspek ket mabigbig na.
Agpapan maisursurat ti damag ket awan pay ti narekobre ti pulisya a basyo wenno slug iti nakapasamakan ti pammaltog.
Kabayatanna, agtultuloy ti naun-uneg nga imbestigasyon dagiti otoridad seknan iti nasao nga insidente.
