LAOAG CITY – Inlawlawag ni Mr. Romeo Andres, driver ti bus ti pannakabato ti iturturong na a pampasahero a bus bayat ti panagpaamianan na iti Brgy. Maglaoi Sur, iti ili ti Currimao.
Kuna na nga adda ti nasabat da a nakalugan ti motorsiklo ken kelaat nga inbato da ti nagtubtuban ti hallowblock nga addaan ti semento iti windshield ti bus.
Saan a naripar ni Andres no mano ti nakalugan iti nakasabet na a motorsiklo a maatap a nangibato ti nasao a natangken a banag.
Inbatad ni Andres a simmalpot ti nasao a banag iti windshield ti bus.
Segun kenni Andres, possible a naala ti CCTV Camera a nakamontar iti sango ti bus ngem mareview laeng daytoy iti Metro Manila.
Innayon na a saan a nadangran kalpasan ti insidente itay alas dos ti parbangon iti nasao a lugar.
Mainaig iti daytoy, inpasingked ni Police Master Sgt. Eduardo Dancel, imbestigador ti PNP Currimao a nakikoordinar dan kadagiti barangay no adda dagiti CCTV footage a possible a nagdalanan dagiti nakamotorsiklo.
Mainaig iti daytoy, narisgu para kenni Engr. Neil Jose, operations manager iti Florida Bus Company ditoy probinsya ti inaramid dagiti nakamotorsiklo gapu ta dandanin a mataaman ti driver.
Kuna na a dagiti kangrunaan a matiltiliw nga agbakal ti bato kadagiti pampasahero a bus ket nakainom wenno pagtripan laeng dagiti maseknan.
Plano ni Jose a mangted ti gunguna kadagiti makaitudo dagiti nagbakal ti bato iti maysa kadagiti bus ti nasao a kompanya.
Inbatad na nga itawag laeng iti opisina da tapno matiliw ti saan a nabigbig a suspek.
Innayon ni Jose nga adun dagiti nakasuan ken naibalud a nagbakal iti bus ken saan kuma nga aramiden dagiti tattao ti agbakal kadagiti bus gapu ta maipan iti peggad dagiti nakalugan.
Maipalagip nga adda dagiti immunan a pannakabakal dagiti bus ti nasao a kompanya ngem natiliw dagiti suspek ken naibalud da kas kadagiti dua a natiliw iti Cabugao, Ilocos Sur.
