LAOAG CITY – Naikeddeng inton Septiembre 7 ti canonization ti naawagan a kaunaan a millennial saint a ni Carlo Acutis.
Inrakurak ni Pope Leo XIV ti nasao a canonization ni Acutis no sadinno daytoy ti agbalin a kaunaan a panag-canonize ti Santo Papa iti panagtugawna.
Idi Abril 27 koma daytoy a naisayangkat ngem naitantan gapu iti pannakatayna ni Pope Francis.
Natay ni Acutis iti tawenna a 15 idiay Northern Italy idi 2006 gapu iti leukemia.
Idi sibibiag pay daytoy ket mahilig isuna iti hiking, video games ken panagangaw kadagiti pagayamna.
Nangisuro isuna ti katekismo kadagiti lokal a parokya ken timmulong kadagiti marigrigat.
Gapu iti kinalaingna iti computer ket nakapartuat isuna ti online exhibit mainaig iti sumurok 100 nga eucharistic miracles a binigbig ti simbaan ti sumagmamano a siglo.
Nagbalin a maysa a pilgrimiage site ti tanemna idi 2025 no sadinno a nakaikabil daytoy iti sarming a kabaong ken nakasuot laeng isuna ti maong a pantalon, sweatshirt ken sneakers.
Makagiddanna iti canonization ni Italian Catholic, Pier Giorgio Frassati a pimmusay iti tawenna a 24 kalpasan a nakaptan ti polio.
