LAOAG CITY – Inpakaammo ni Mr. Mark Angelo Barangan Physical Instructor iti Mariano Marcos State University College of Arts and Sciences ti importansya ti pisikal nga aktibidad iti maysa nga indibidual.
Kuna ni Barangan a malaksid kadagiti nagduduma nga aktibidad nga ar-aramiden iti inaldaw ket napateg nga adda ti panag-ehersisyo.
Inbatad na a daytoy ti makatulong iti panangpatalinaed a nasalun-at ti bagi kageddan ti panangipauneg ti husto a nutrisyon.
Mainaig iti daytoy, inbaga ni Barangan a malaksid iti pannakapadur-as ti pisikal a salun-at ket mapagtalinaed nga epektibo ti mental health babaen iti ehersisyo.
Innayun na a dagiti problema iti pisikal, mental, emotional ken dadduma pay ket isu ti karaman a malappeddan babaen iti panangaramid ti nagduduma a klase ti ehersisyo.
Immuna iti daytoy, inpagunam-gunam ni Barangan nga importante ti self-care wenno pannagipateg ti bagi rason a saan laeng a kanayun a trabaho ngem ketdi masapol nga aggaraw ti bagi babaen iti panag-ehersisyo.
