LAOAG CITY – Nakasaganan ti Provincial Government of Ilocos Norte nga ag-host iti “Little League Philippine Series National Finals 2026.”
Segun ken ni Mr. Faivo Bartolome, Sports Consultant ti Ilocos Norte Sports Development Office, maisayangkat ti nasao nga aktibidad iti masungad nga Abril 17 agpatingga iti Abril 25.
Inpakaammona a 170 dagiti team manipud iti nagdumaduma a paset ti pagilian ti makipartisipar.
Mainaig iti daytoy, inbatadna a mapattapatta nga umabot iti lima ribu dagiti agsangpet a sangaili ti Ilocos Norte.
Kunana a nalpas metten ti inspeksion ken beripikasion kadagiti mausar a lugar a pakaisayangkatan ti ay-ayam pakairamanan dagiti agserbi a “billeting areas” para kadagiti nagdumaduma a delegasion.
Kabayatanna, kuna ni Bartolome a kinuyogna iti immun-una a gundaway a nagturong iti opisina ni Gobernador Cecilia Araneta Marcos da Mr. Jenno Camo, Assistant District Administrator ti Little League Philippines ken ni Mr. Chito Rodriguez, Consultant ti Little League Philippines.
Naammoan a ditoy nga inpadanonda ti napalaus a panagyamanda iti gobernador iti suporta nga ipapaayna ken ti sibubukel a gobierno probinsial iti 2026 Little League Philippine Series.
Inlawlawagna a ti kaadda ti napudno a tarigagay ti gobernador a mangipatungpal iti “youth development” ken “grassroots sports” ket dakkel a mangpatibker kadakuada bayat ti agtultuloy a panagsaganada para iti nasao a torneo.
Innayonda a dakkel a tulong ti ipapaay ti gobierno probinsial a suporta para iti panagbalin ti torneo a napnoan kaipapanan, organisado ken nakallalagip para kadagiti ubbing nga atleta.
Mangnamnamada a daytoy ti mangitandudo iti “sportsmanship,” “teamwork” ken ti masakbayan ti baseball ken softball ditoy Pilipinas.
