LAOAG CITY – Dakkel a tulong ti panag-post iti social media kadagiti negosio.
Segun ken ni Mr. Kenneth Wayne Viluan, maysa a negosiante iti Barangay Ricarte iti siudad ti Batac, babaen iti daytoy a wagas ket ad-adda a maipayam-ammo kadagiti tattao ti negosioda nangruna ket kaaduan kadagiti tattao ket addaan ti bukudda a social media account.
Inbatadna a dagiti estudiante ti kangrunaan a kustomerda gapu ta mahilig dagitoy ti agkape ken kabaelanna ti nalaka a presio ti ididiayada a kape.
Inlawlawagna a napan pay daytoy idiay siudad ti Baguio tapno mangkita ken gumatang ti coffee beans a mausar a ramen iti kapeda.
Kunana a nangala isuna ti Barista Specialist tapno mabukel ti recipe ti kape ken dua a Chef tapno mangluto kadagiti dadduma pay a taraon nga ididiayada.
Mainaig iti daytoy, kuna ni Viluan a dagiti sumagmamano nga ididiaya iti coffee shop-da ket ti milky matcha, white chocolate, dark chocolate, nachos, ramen ken dadduma pay.
Innayonna a saan daytoy a mahilig ti agkape ngem gapu ta isu ti kaay-ayo dagiti agtutubo ket pinilina daytoy a negosio.
