LAOAG CITY – Nadismaya ti Sang Panlungsod ditoy ciudad ti Laoag gapu ta uray naipangaton ti tawen dagiti mabalin nga agtugaw kas SK officials iti maysa a barangay tapno saan nga agbalin a lapped ti panagadalda ngem adu latta ti agres-resign iti puesto.
Segun ken ni Sangguniang Kabataan Federated President Michael Christophe Agustin, apaman a bimmisitada iti Barangay 22 San Andres ditoy siudad ket naduktalanda nga ag-resign ti puesto ti Sangguniang Kabataan Chairman iti nasao a barangay.
Inbatadna a daytoy ket gapu ta kalikagumda a maaddaan ti napinpintas nga oportunidad.
Inlawlawagna a daytoyen ti maika-siam a Sangguniang Kabataan official a nagikkat iti unos ti panagtakemna kas Sangguniang Kabataan Federated President ditoy siudad ti Laoag.
Kabayatanna, inpakaammonna a kasapulan nga agtultuloy ti pannakaisayangkat ti consultation visit kadagiti barangay tapno mapapigsa ti relasionda kadagiti barangay council.
