LAOAG CITY – Target ti Pilipinas ken Japan nga i-revisit ti panagadal idi 2014 mainaig iti epekto ti napigsa a ginginged manipud iti West Valley Fault.
Inbatad ni Dr. Teresito Bacolcol, director ti Philippines Institute of Volcanology and Seismology (Phivolcs), plano a maminsan manen a lukatan ti nasao a panagadal iti nagbaetanda ti Japan International Cooperation Agency (JICA) inton sumaruno a tawen ken adda ti agtultuloy a panagsinnarita mainaig iti daytoy ken maiyur-uray laengen dagiti sumagmamano a panagpirma.
Kunana a ti nasao a panagadal ket addan ti 20 a tawen ken sipod idin ket immadu ti populasion idiay Metro Manila.
Inlawlawag ni Dr. Bacolcol, naiwayat idi 2004 pay laeng ti panagadal nga inawagan a Metro Manila Earthquake Impact Reduction study a pinundoan ti Japan no sadinno a naidatag ditoy ti risk assessment iti posible a magnitude 7.2 a gingined manipud iti West Valley Fault.
Inpettengna a no aggaraw ti West Valley Fault, ti sibubukel a rehion ket makapasar ti Intensity 8 a panagdayyeg a pudno a naamak ken narisgo.
Iti Metro Manila pay laeng, mabalin a dumanon iti 33 a ribu ti posible a matay ken posible a ngumato pay iti 48 a ribu no iraman dagiti dadduma pay a probinsia.
Mapattapatta nga adda ti 114 a ribu a tattao ti posible a masugatan basar iti panagadal.
Innayonna a manamnama a makumpleto ti panagadal iti uneg ti dua a tawen no sadinno ti Japan International Cooperation Agency ti mangbaklay iti magastos idinto a ti Pilipinas met ti mangipaay iti ahensia kadagiti datos.
