LAOAG CITY – Inpasigurado ni Police Major Joseph Tayaban, ti chief of police ti PNP-Badoc a nakasagana ti pulisya para iti posible a panagado dagiti sumrek ditoy probinsya iti sumarsaruno nga aldaw.
Segun kenni Tayaban, kanayon a nakasagana dagiti kameng ti PNP kangrunaan na iti border control.
Kunana a namnamaen da ti panagado ti bilang dagiti sumrek ditoy probinsya para iti pyesta dagiti minatay kasta pay dagiti umay agbakasyon.
Mainaig iti daytoy, pinalagipan ni Tayaban dagiti sumrek a masapol a kumpleto ti dokumento da gapo ta saan da a makastrek no kurang dagitoy.
Inlawlawag na a mabalinen ti negatibo a resulta ti antigen test no sumrek ditoy probinsya saan a kas iti dati nga RT-PCR ti masapol, malaksid laeng kadagiti ROF gapo ta required kadagitoy ti RT-PCR test result.
Inbatad na pay a manamnama iti sumarsaruno nga aldaw key umado dagiti sumrek iti Ilocos Norte nangruna ket dakkel a banag ti pannakapalukay ti restriksyon ken ti pannakaipababa ti bayad ti Rapid Antigen Test.
