LAOAG CITY – Ilunglungalong ni Senate President Vicente Sotto III ti alisto a pannakaamendar ti Comprehensive Dangerous Drugs Act wenno Republic Act 9165.
Daytoy ket gapu iti makaalarma a panagngato ti bilang dagiti kaso ti illegal a droga nga ibasbasura ti korte gapu laeng iti teknikalidad.
Basar iti datos nga inparuk-at ti senador, umabot iti 284 a drug-related acquittals ti nairekord ti Court of Appeals iti uneg laeng ti lima a bolan wenno manipod Enero agingga iti Mayo 2025.
Segun ken ni Sotto, ti nasao a bilang ket nangatngato no ikompara iti pakabuklan nga estatistika idi 2018.
Rimuar iti panangtingiting a ti kangrunaan a problema kadagiti kaso ket ti naiget a Chain of Custody Rule iti babaen ti Section 21 ti linteg, a masansan a saan a masursurot dagiti operatiba iti ground.
Kas solusyon, kalikagom ti Senate President a palukayan ti rekisitos ken ipalubos ti panagusar ti body-worn cameras wenno panagala kadagiti ordinary a testigo kadagiti buy-bust operations kasukat dagiti opisyal a testigo.
Kagiddan iti daytoy, indasar met ni Sotto ti gakat a pannakabuwangay ti Presidential Drug Enforcement Authority (PRDEA).
Iti babaen ti Presidential Drug Enforcement Authority, pagmaymaysaen iti maymaysa a disso ti amin nga aspeto ti kampanya kontra illegal a droga, manipod iti enforcement ken prosecution, agingga iti prevention ken rehabilitation para iti maysa nga holistic approach.
