LAOAG CITY – Agpaut ti innem a bulan sakbay nga agsardeng ti panagalburoto ti Bulkan Mayon idiay Bicol.
Inbatad ni Philippine Institute of Volcanology and Seismology (Phivolcs) Director Teresito Bacolcol, no ti pangibasaran ti napasamak a panagalburoto ti bulkan idi 2023, immabot laeng iti tallo a kilometro ti lava flow ngem daytoy nga aktibidad ti Mayon iti agdama ket awan pay ti makitkita a panagalburoto ti lava wenno bumegbeggang nga apoy manipud iti bulkan.
Inlawlawag ni Bacolcol a ti napigsa a volcanic unrest ket alisto laeng a saan a kapada ita a nakapsot kas ti ipakpakita ti bulkan.
Basar iti record, idi pimmutok ti Bulkan Mayon idi 2018 ket nagpaut daytoy ti dua a bulan sakbay a nagsardeng idinto nga idi pimmutok ti bulkan idi 2000 ket immabot laeng daytoy ti dua a lawas agingga a nagulimek ngem immabot daytoy iti alert level 5 status isut gapuna a naipawil ti panagserrek idi ti asinoman iti 8 kilometer radius manipud iti ngiwat ti bulkan.
Inpetteng ni Bacolcol nga iti baet nga agtultuloy ti nakaro nga aktibidad, awan pay ti rason nga iyetnag daytoy iti Alert level 4 status gapu ta awan pay ti nakita a nakaro a parameters kas ti panagngato ti masansan a Pyroclastic Density Currents (PDCs) wenno “uson,” lava fountaining, lava flow ken masansan a volcanic earthquakes.
Kunana a ti inpugso ti nasao a bulkan ket saan a lava, uson ken rockfalls a makitkita iti rabii nga agmaris ti nalabbaga a bumegbeggang.
Iti napalabas a 24 nga oras, nakairekord ti panangbukel ti lava flow, 150 Rockfall events, 90 PDCs, crater glow, panagpugso ti 195 a tonelada ti asupre ken panagmaga ti bulkan.
Kabayatanna, bayat a maisursurat daytoy a damag ket adda iti babaen ti Alert level 3 wenno mangipasimudaag nga adda ti nangato nga aktibidad ti Bulkan Mayon.
