LAOAG CITY – Panagan-anus iti biag ken iti negosyo, ti tulbek tapno magun-od ti arapaap iti biag.
Daytoy ti inbatad ni Mrs. Susan Corpuz, iti Barangay Davila, iti ili ti Pasuquin ken addaan ti negosyo a grilled seafoods.
Segun ken Corpuz, masapul a panunoten a nasayaat ti ipasdek a negosyo tapno makatulong daytoy a mangpasayaat iti biag.
Dua pulo a tawenen ti negosyo ni Corpuz ket agpapan ita ket ado latta dagiti gumat-gatang iti produkto da.
Naammuan a dati a fish dealer isuna ngem idi napadasannan ti agtuno-tuno kadagiti nagduduma a klase ti ikan kas iti pusit, paltat, susay, tuna, durado, bangus, tilapia ken dadudma pay ket saannan nga inibbatan pay daytoy a negosyo gapu ta dakdakkel ti main-income da iti panagtuno-tuno.
Kunana nga iti babaen ti negosyo na ket masus-sustinir na ti gasgastusen da nangruna ti panagpabasa ti anak na, nga iti agdama ket mangal-ala ti kurso a Criminology.
Kabayatanna, iti met bulan ti Disiembre ken Holy Week ti maibilang a kapigsaan ti negosyo da.
Ngem no pay kasta, saan a maliklikan a kumapsot ti kita da nangruna no adda sumangbay a bagyo.
Saan man nga agpapada ti kaado dagiti aggatang, agyamyaman latta ni Corpuz gapu ta inal-aldaw latta a saanda a maaw-awanan ti customer.
