LAOAG CITY – Inpaulog ti Department of Agriculture (DA) ti temporary ban ti panagangkat kadagiti produkto a manok manipud iti Michigan, United States.
Daytoy ket kalpasan nga inpadamag ti World Organization for Animal Health ti local outbreak ti H5N1 wenno bird flu.
Ti pannakaipakat ti import ban ket babaen ti Memorandum Order no. 24 nga inruar ni DA Secretary Francisco Tiu Laurel Jr.
Kasta met iti babaen ti nasao a memo, nasuspende ti pannakaipaulog ti Sanitary and Phytosanitary Import Clearance ti Bureau of Animal Industry para kadagiti produkto ti manok nga aggapu idiay Michigan, pakairamanan ti karne ti manok, day-old chicks, itlog, ken dadduma pay.
Idi napan a lawas, nangipaulog met ti DA iti import ban kadagiti produkto ti manok nga aggapu idiay Australia, gapu pay laeng iti panagraira ti bird flu.
