LAOAG CITY – Naisardeng ti panagaramid ti Angkas Pass iti barangay gapu ti naiget a panangipawil ti PNP ti panagilubbon iti motorsiklo.
Segun kenni Police Major Artemio Clemente, officer in charge ti PNP Batac, naiget ti panagsita da kadagiti agiturturong ti motorsiklo kangrunaan kadagiti adda ti lubbon na.
Kuna na a napagnunumuan dagiti amin a chief of police ditoy probinsya ken adda ti mandar ti Ilocos Norte Police Provincial Office a maipawil pay laeng ti panagilubbon iti motorsiklo.
Naiget ti panangimpormar da ti publiko seknan ti nasao a banag gapu ta nangina ti multa dagiti matiliwan.
Umabot iti lima a ribo a pisos ti multa iti babaen ti pagalagadan ti gobyerno probinsial ken 500 a pisos met ti multa na iti babaen ti pagalagadan iti lokal a gobyerno iti siudad ti Batac.
Maipalagip nga immunan a naipalubos ti agilubbon iti motorsiklo ken nasken nga addaan ti Angkas Pass.
Kabayatanna, inrakurak ni ABC President Mikee Fariñas ditoy siudad ti Laoag nga awanen ti bisa dagiti naiyisyu nga Angkas Pass kadagiti residente tapno makailubbon iti motorisklo.
Daytoy ket gapu ti mandato ti gobyerno national seknan ti pannakaipawil ti panagilubbon, sinuportaran met ti gobyerno probinsyal ken iti lokal a gobyerno ditoy siudad.
Kuna na a ti problema dagiti opisyal ket dagiti barangay a nagpabayad ti Angkas Pass kalpasan a naikaten ti bisa ti nasao a sertipikasyon.
Innayon ni Fariñas a mapagsasaritaan a naimbag no kasano ti wagas a panagtaming da ti problema kadagiti barangay a nagpabayad ti Angkas Pass kalpasan a naikkaten ti bisa na a mausar daytoy.
