LAOAG CITY – Inpakaammo ni Jail Officer 2 Mary Ann Cabanatan, ti Unit CRS Officer Batac District Jail a maysa nga highlight iti Bureau of Jail Management and Penology iti siudad ti Batac ket dagiti livelihood dagiti balud.
Segun kenkuana, masapol a nasken laeng a mangipaayda ti developmental opportunity para kadagiti Person Deprived of Liberty tapno naan-anay dagitoyen nga agbalbaliw manipod iti dakes nga aktibidad a nakairamramananna iti kallabes.
Inbatadna a napanunutanda daytoy bayong making gapu ta adda ti maysa a personnel-da nga ammona ti agaramid ti bayong bags pakairamanan ti panangikabil ti disenio dagitoy babaen iti panangpinta kadagiti nasao a bayong nga ad-adda a makaallukoy kadagiti gumatang.
Kunana a nawaya met nga insuro ti personnel-da a mangisuro kadagiti balud isu nga intultuloyda latta daytoy.
Inlawlawagna a babaen iti daytoy ket adun dagiti napastrek dagiti maseknan a balud a dakkel a tulong daytoy kadakuada ken ti pamiliada.
Innayonna nga iti baet nga addada iti uneg ti pagbaludan ket maaramidda latta dagitoy a makatulong kadagiti pamiliada.
Kabayatanna, naammoan nga adda dagiti agpapaaramid kadagiti personal bags no sadino makaar-aramid dagiti balud ti sangapulo a bayong iti kada aldaw.
