LAOAG CITY – Nakasaganan ti pasdek a pakaiyestablisaran ti Textile Innovation Hub iti siudad ti Batac.
Segun ken ni Mr. Hashler Garalde, Bamboo Focal Person ti Provincial Government of Ilocos Norte a masarakan daytoy iti Brgy. Mabaleng a pakasarakan iti “research and development” para iti pannakaipadur-as ti industria ti kawayan iti tulong ti Mariano Marcos State University.
Inbatadna a manamnama nga iti nasapa a paset daytoy a tawen ket ipaima ti gobernador dagiti makinaria a kasapulan iti panangala ti “bamboo fiber” a maaramid a tela.
Maipalagip nga ipanpannakkel ti gobernador ti kinapintas ti tela a naaramid manipud iti kawayan.
Inlawlawag ni Garalde a malaksid iti siudad ti Batac ket manamnama a maipatakder iti mabiit ti pasdek a mapagbalin a “Textile Innovation hub” iti ili ti Vintar.
Kunana a nupay saan pay a nalpas ti nasao a proyekto ket manarimaanen a maiprosproseso ti pannakagatang dagiti maiyasping a makinaria ken kagamitan para iti panagaramid ti tela manipud iti kawayan.
Mainaig iti daytoy, inpakaammona a kalikagum ti gobernador nga adda ti maiyestablisar a plantasion ti kawayan ditoy probinsia nangnangruna iti “specie” a kawayan tinik a maibilang a kapintasan a pangalaan ti “bamboo fiber.”
Kuna ni Garalde a ti tumultulong iti maikadua a distrito wenno iti siudad ti Batac ket ti Regional Office ti Department of Science and Technology idinto nga iti umuna a distrito ket ti Phil. Textile Research Institute wenno PTRI nga adda met laeng iti babaen ti DOST.
Innayonna a pursigido ti gobierno probinsial a mangipadur-as iti industria ti kawayan gapu ta mamati a mangipaay daytoy iti dakkel a pamastrekan dagiti kakailian.
