LAOAG CITY – Dinayaw ni Bombo International Correspondent Atty. Arnedo Valera iti Amerika ti nagbalin a desisyon ni Presidente Rodrigo Duterte a nangawat iti imbitasyon ni US President Joe Biden nga agatendar iti inorganisar na a Summit of Democracy a nangrugi idi rabii agpatingga ita nga aldaw.
Kuna ni Valera a ti panaghost ni US President Biden iti nasao a summit ket inpakita na ti kinapakumbaba na.
Inbatad na pay a gagem ti Summit of Democracy nga inorganisar ni Biden a makasursuro dagiti nagatendar a pagilyan iti tunggal maysa.
Mainaig iti daytoy, kuna ni Atty. Valera a ti panangawat ni Presidente Duterte iti imbitasyon ni President Biden ket mangipakita a saan nga anti-US government.
Innayon na a daytoy ti mangipasimudaag a silulukat ni Presidente Duterte a maaddaan ti napintas a relasyon ti Pilipinas kadagiti amin a pagilyan.
Maipalagip a sipud nagturay ni Presidente Duterte ket arigna inyadayo na ti Pilipinas iti Amerika idinto nga ad-adda a nagbalin a nasinged kadagiti pagilyan a maibilang kas anti-Americans, partikular ti Russia ken China.
