LAOAG CITY – Nagyaman ni House Speaker Martin Romualdez iti administrasion Marcos iti in-inot a panagbaba ti presio ti bagas iti merkado no sadinno a dagiti sumagmamano a napipintas a klase ti bagas ket magatang laengen iti P42 iti kada kilo.
Inbatad ni Romualdez nga iti babaen ti Executive Order (EO) 62 wenno ti panagbaba ti taripa iti 15% manipud iti 35% a naipatungpal idi Hulio 5 ket nagresulta iti panagbaba ti presio ti bagas.
Inpasiguradona a ti panagbaba ti presio ti bagas ket agtultuloy agingga a madanon ti paskua.
Kabayatanna, kuna ni Romualdez a saan laeng a ti panagbaba ti presio ti bagas iti merkado ti kitkitaen ti gobierno no diket iti panangsolbar mismo iti nagtaudan ti problema pakairamanan ditoy ti panangidasar ti solusion para iti panagngato ti domestic rice production, panangpasayaat ti import regulations ken panangtiliw kadagiti karaman iti illegal trade practices.
Basar iti monitoring ti Department of Agriculture ti average retail price dagiti bagas ket dumanon iti P47 agingga iti P51 iti kada kilo.
