LAOAG CITY – Inpetteng ni Miss Cathy Estavillo, ti sekretaryo ti Bantay-Bigas a saan a rumbeng nga ipanakkel ti gobierno ti panagbaba ti presyo ti bagas manipod iti 45 a pisos ket napagbalin a P43 a pisos.
Reaksyon daytoy ni Estavillo kalpasan nga inrakurak ni Department of Agriculture Assistant Secretary Arnel de Mesa a mangrugin a mailako ita nga aldaws, Oktubre 11 ti well-milled rice nga agbalor ti P43 ti kada kilo iti babaen ti Rice-for-All program na.
Inpaganetget ni Estavillo a ti nasao a presyo ket magatang laeng kadagiti Kadiwa Centers no sadinno a dagiti laeng mabenepisyaran ket dagiti senior citizens, solo parents, ken miembro ti Pantawid Pamilyang Pilipino Program (4Ps).
Kuna pay ni Estavillo a ti makitkita na pay a problema ket mapan paylaeng rantaen dagiti maseknan nga umili dagiti Kadiwa centers isut gapuna nga ado dagiti gumatang laengen iti lugar da uray nanginngina gapu ta awan serbina no maysa a kilo laeng ti kabaelan da a gatangen.
Mainaig iti daytoy, inpalgak ni Estavillo nga artificial laeng ti panagbaba ti presyo ti bagas gapu ta nagtalinaed a ti pangnamnamaan ti gobierno ket babaen iti importasyon tapno maipababa ti presyo ti nasao a produkto.
Innayon na a kanayun nga irakurak ti gobierno a bumaban ti presyo ti bagas gapu ta ado dagiti imported ken manarimaanen ti panagapit dagiti lokal a mannalon.
Nupay kasta, inbatad na a sipud napagbalin a naan-anay a linteg ti Republic Act 11203 ket saanen a marikna ti panagapit dagiti lokal a mannalon gapu ta nagtalinaed a nangato ti presyo ti bagas iti merkado a nangitunday ti mono-poly ti presyo kalpasan a naipasan iti pribado ti panangituding ti presyo ti bagas iti merkado.
Mainaig iti daytoy, inrakurak ni Estavillo a ti panagbaba ti presyo ti bagas ket temporaryo laeng gapu ta saan met nga aggapo a mismo iti lokal a produksyon.
Kabayatanna, inpetteng ni Estavillo a narigat a namnamaen ti inkari ken agtultuloy nga ikarkari ni Presidente Ferdinand Marcos Jr. a bumaba ti presyo ti bagas gapu ta ti pangnamnamaan na laeng a paggapwan ti produkto ket panagangkat iti nagduduma a pagilian.
