LAOAG CITY – Mamati ti National Economic and Development Authority (NEDA) a mangipasimudaag ti ngumatngato a kalidad ti trabaho ditoy pagilian ti agtultuloy a panagbaba ti unemployment ken underemployment rate.
Daytoy ket kalpasan a bimmaba iti 3.1% ti unemployment rate ti pagilian idi Disiembre 2024 a kababaan nga antas sipod idi 2005.
Segun ken ni National Economic and Development Authority Undersecretary Rosemarie Edillon, mangipakpakita a manipud iti tunggal maysa a ribu a mangmangged, 31 laeng kadakuda ti awanan ti trabaho.
Malaksid iti daytoy, ngimmato pay ti 70% ti bilang nga addaan ti full-time a trabaho a mangipakpakita ti ad-adu a mangmangged ti addaan ti stable income.
Kabayatanna, agtultuloy nga ilunglungalong ti National Economic and Development Authority ti economic transformation agenda tapno mapagtalinaed ti panagdur-as ken kinatibker ti ekonomia.
Naammoan a karaman ditoy ti panagusar ti innovation, teknolohiya ken strategic investment tapno mapadur-as dagiti baro nga industria ken aramiden nga ad-adda pay a competitive ti pagilian iti lumawlawa a world market.
