LAOAG CITY – Nanayunan dagiti serbisio nga idandanon ti gobierno probinsial babaen iti Capitol Express Program wenno “CapEx” kadagiti nagdumaduma a lugar ditoy probinsia.
Segun ken ni Gob. Matthew Marcos Manotoc, maidiaya iti kaunaan a gundaway iti daytoy a programa ti pannakabakuna dagiti umili iti “booster”.
Nupay kasta, inlawlawagna nga agtultuloy dagiti regular a serbisio iti babaen ti CAPEX kas iti Kadiwa on Wheels; libre a panagpakonsulta kadagiti doctor kageddan ti pannakaipaay ti agas a kasapulan dagitoy, panagibunong iti kasapulan dagiti mannalon iti kataltalonan, bitamina ken pagpurga kadagiti taraken; wheelchair, sarrukod, anteohos para kadagiti senior citizen; merienda ken school supplies para kadagiti ubbing a maipaima kadagiti daycare workers.
Immunan nga inlawlawag ti gobernador a sumagmamano a bulan a saan a naisayangkat ti nasao a programa ti probinsia gapu ta naapektaran iti COVID-19.
Mainaig iti daytoy, inkari na a subbuten daytoy ti probinsia babaen iti pannakasursor dagiti amin a lugar ditoy probinsia iti uneg ti maysa agingga dua a bulan.
Naammoan a sipud nagsubli ti nasao a programa ti probinsia idi Pebrero 22 ket nairugi ditoy siudad ti Laoag ken naisaruno iti sumagmamano nga ili kas iti ili ti Solsona, Paoay, Pagudpud, San Nicolas pakairamanan iti siudad ti Batac.
