LAOAG CITY – Inpakaammo ni Mr. Jhey-ar Mangati, ti Health Education ken Promotions Officer ti Mariano Marcos Memorial Hospital and Medical Center iti Siudad ti Batac a pormalen a nangrugi ti panagbakuna para kadagiti maibilang a Pediatric A3 wenno dagiti agtawen ti 12 agingga 17 nga addaan ti comorbidities.
Segun kenkuana, 100 nga ubbing ti target da a mabakunaan iti umuna nga aldaw a pannakaisayangkat ti ceremonial kick-off COVID-19 vaccination roll-out.
Inlawlawag na a maipangpangruna dagiti ubbing a residente ditoy Ilocos Norte a mabakunaan kontra iti makapatay a virus.
Inbatad na nga awan met ti dakkel a nagbaliwan dagiti masurot a pagalagadan iti panagpabakuna malaksid laeng ti panangitugot dagiti maseknan ti medical certificate nga inted ti attending pediatrician wenno physician kadakuada.
Kunana a masapol nga adda ti nagannnak wenno legal guardian dagiti ubbing a mangkuyog ken mangbayabay kadakuada gapu ta no awan ket saan da a mabakunaan nangruna ket menor de edad met pay laeng dagitoy.
Dinakamat na nga adda pay pirmaan ti nagannak wenno legal guardian a mangibagbaga a dagitoy ket sipapalubos a mabakunaan dagiti annak da wenno kapamiliada kontra iti COVID-19.
Mainaig iti daytoy, kunana a Pfizer vaccine ti mausar a brand ti bakuna para kadagiti ubbing gapu ta maibasar iti Department of Health ket daytoy laeng a bakuna ken Moderna vaccine ti addaan ti Emergency Use Authorization wenno EUA para kadagiti nasao a maseknan.
Innayon na nga inton Nobiembre 2, 2021 ti pannakaisayangkat ti maikadua a vaccination roll-out para kadagiti ubbing.
