LAOAG CITY – Agtultuloy latta ti panagbakuna kadagiti ubbing kontra iti sakit a Rubella, Polio, ken kamuras kadagiti health facilities kangrunaan na dagiti Rural Health Unit (RHU) ken Out-Patient Department dagiti nagduduma nga ospital ditoy Ilocos Norte.
Daytoy ti inpakaammo ni Dr. Rogelio Balbag, Executive Director ti Ilocos Norte Hospital and Management Council iti baet a nagngudon idi Hunyo 15 ita a tawen ti “Chikiting Ligtas 2023”.
Mainaig iti daytoy, naragsak a nangipakaammo ni Balbag a naartapan ti Ilocos Norte ti target ti gobierno national a masapol a mabakunaan ti 95 a porsiento ti total eligible population dagiti ubbing kontra kadagiti nasao a sakit.
Inpakaammo ni Balbag nga iti sakit nga oral polio ket 96.22% ti pakabuklan dagiti ubbing a nabakunaan idinto a 96.75% iti sakit a kamuras ken rubella.
Inpalagip ni Balbag ti kinapateg ti pannakabakuna dagiti ubbing kontra kadagiti nadakamat a sakit.
