LAOAG CITY – Maudin ita nga aldaw ti vaccination rollout kontra iti covid-19 para kadagiti ubbing nga agtawen ti 12 agingga iti 17 ita a lawas.
Inlawlawag ni Dr. Charito Malicad, Information Officer ditoy ciudad ti Laoag a ti naituding a mabakunaan intono bigat ket dagiti umawat ti second dose ti bakuna.
Nupay kasta, kunana nga iti sumaruno a lawas ket maitultuloy ti panagbakuna kadagiti ubbing.
Mainaig iti daytoy, balligi met ti ummuna a tallo nga aldaw a panagbakuna dagiti ubbing no sadinno nga iti ummuna nga aldaw ket nasurok 200 ti nabakunaan.
Target met ti ciudad a bakunaan ti 12 a ribo manipud iti pakabuklan a populasyon iti nasao nga age group ken nakadepende iti profiling nga iyus-uswat ti City Planning and Development Office ken ti Vaccination Operation Center ti ciudad.
