LAOAG CITY – Maipatpatungpal ti panagbalasa kadagiti agpapaay iti Ilocos Norte Electric Cooperative wenno INEC.
Daytoy ket kalpasan a rimmuar iti “audit” nga insayangkat ti National Electrification Administration wenno NEA iti Ilocos Norte Electric Cooperative a saan a pannakasurot dagiti umiso nga “accounting principles” para iti maysa a kooperatiba.
Inlawlawag ni Mr. Cipriano “Perry” Martinez, Acting General Manager ti Ilocos Norte Electric Cooperative a ti pay laeng naipadalan iti audit ket iti tawen 2021 ken 2022.
Nupay kasta, kunana a bayat nga umun-uneg ti imbestigasion ket rumrummuar a saanna a masinunuo no asino dagiti rumbeng a pagtalkanna rason a napanunutanna ti pannakabalasa dagiti empleado.
Inbatadna nga iti napalabas nga innem a bulan ket inikkanna ti gundaway dagiti empleado ngem awan a pulos ti nangipakaammo kenkuana kadagiti napaspasamak nangnangruna kadagiti adda pakainaigan dagiti “financial transaction”.
Kangrunaan a pakaladingitan ni Martinez ti pannakaduktal iti pakpakauna nga imbestigasion nga iti panaggunay ni Gob. Matthew Marcos Manotoc bayat ti kangitingitan ti kaadu dagiti reklamo iti kinangina ti pagbayad ti kuryente ket napatgan ti kiddaw ti gobernador iti San Miguel Corporation a maipababa ti pagbayad ti kuryente.
Kunana nga adda met ti nakaipababaan iti pagbayad ti kuryente ngem saan a naipatungpal amin ti inyetnag ti San Miguel a pakaipababaanna.
Inlawlawagna a rumrummuar a nangrugi pay idi Pebrero iti tawen 2023 nga impababa ti San Miguel ti singirna iti nababbaba ngem sangapulo a pisos a kas iti inkarida ken ni Gob. Manotoc ken ti pakaladingitanna unay ket ti “billing” iti Hunio 26 agingga iti Hulio 25 a ti laeng siningirda ket 7.7513.
Nupay kasta, ti siningir ti Ilocos Norte Electric Cooperative kadagiti Member Consumer Owners ket sangapulo ket maysa a pisos a kaipapananna a nangatngato iti 3.44 a pisos.
Inbatad ni Martinez nga iti panangdamagna iti “finance department” no apay a kasdiay ti napasamak iti baet ti panangikarkarigatan ti gobernador nga agtrabtrabaho para iti pannakaipababa ti kuryente ket ti laeng sungbatda ket isu ti naibilin kadakuada.
Mainaig iti daytoy, kunana a kalikagumna a maisayangkat ti imbestigasion kadagiti immun-una a tawen kadagiti kallabes nga administrasion ti Ilocos Norte Electric Cooperative.
Innayonna a mabalin nga awan ti maisayangkat a panagbalasa no inpakaammo dagiti maseknan dagiti ammoda sakbay pay a nangisayangkat ti National Electrification Administration ti audit iti nasao a kooperatiba.
