LAOAG CITY – Inbatad ni Mr. Marvin Longboy, October 2023 Forester Licensure Exam Board Passer nga arig na saan pay laeng a mamati a nakapasa iti laksid a daytoy ket maibilang a Person with Disability.
Segun kenni Longboy, iti laksid nga addaan daytoy ti rangkap iti bagi ket saan a nagbalin a lapped tapno gun-oden na ti arapaap na ken daytoy pay a mismo ti pinagbalin na a maysa kadagiti inspirasyon na.
Dinakamat na a gapo iti karigat ti eksaminasyon ket saan na a ninamnama a maysa isuna kadagiti makapasa iti daytoy.
Inlawlawag na nga iti laengen iti panagreview ket narigatan gapo ta saan na unay a makita nangruna iti rabii a daytoy ti kangrunaan a karit kenkuana.
Nupay kasta, inbatad na a saan a naawanan ti namnama ken nagsakripisyo para iti kalikagom na a maipasa ti eksaminasyon.
Naamoan a daytoy met ti ummuna a gundaway a nageksamin rason a napalaos ti panagyaman na kadagiti amin a timmulong kenkuana.
Malaksid iti daytoy, kuna na a bayat ti panagbasa na ket tultulungan wenno as-asistiran isuna dagiti propesor na, banag a pagyamyamanan na ken amin a timmulong ken namati kenkuana.
Inlawlawag na a gapo iti sagsagabaen na ket kanayon nga itulod ken sukunen ti pamilya na sipud nagbasa.
Mainaig iti daytoy, kunana nga idi ubing ket arapaap na ti agbalin nga Agriculturist ngem nagbaliw daytoy idi simrek iti Forestry.
Kunana a maysa kadagiti nakagutigot kenkuana ket ti panagadal met ti uliteg na iti Forestry.
Kabayatanna, binalakadan na a dagiti addaan met ti sagsagabaen wenno rangkap iti bagi a saan da a maawanan ti namnama.
