LAOAG CITY – Inbatad ni Coach Helen Jalon iti Zamboanga Peninsula Region a saanna a ninamnama ti panagballigi da iti Rapid Chess Events aglalo ket daytoy ti umuna a gundaway a nakilaban da iti Palarong Pambansa.
Inpanakkel ni Jalon nga iti Rapid Chess Events ket agpada a nakagun-od ti gold medal dagiti dua nga atleta na nga isuda Khana Katherine Ventolero ken Leslybeth Palangan.
Kuna a ti kangrunaan nga inmula na iti panunot da Ventolero ken Palangan ket agtalinaed a positibo tapno agballigi da iti arapaap da.
Mainaig iti daytoy, agpada da Ventolero ken Palangan a nangibaga a saanda a ninamnama ti panagballigi da aglalo iti pannakagun-od da ti balitok a medalya.
Nupay kasta, kuna da a ti nagun-od da a balligi ket ipangpangruna da nga isagot kadagiti nagannak da, coaches ken amin nga adda tii likudan iti pannakadanun da iti Palarong Pambansa.
Kabayatanna, inbatad ni Ventolero nga agtawen paylaeng iti tallo idi rinugyan ti ama na nga insuro kenkuana ti chess, ngem nagbalin laeng a seryoso iti panagtraining na idi agtawenen ti siyam.
