LAOAG CITY – Inpetteng ti House Prosecution Panel nga umiso laeng nga imbestigaren iti impeachment trail ti pakabuklan a kinabaknang ti asawa ni Vice President Sara Duterte a ni Atty. Manases Carpio uray no pribado nga indibidual daytoy.
Inpanagetget pay daytoy ni House Prosecution Legal Spokesperson Atty. Benjamin Tolosa Jr. iti sango ti kiddawda iti impeachment court nga ipa-subpoena ti bank ken tax rekords ni Vice President Sara Duterte ken ti asawana.
Inlawlawag ni Tolosa a karaman iti sumurok ₱80 milyon a net worth ni Vice President Sara Duterte ti conjugal properties-da nga agasawa.
Dagiti dokumento nga inpa-subpoena ti prosekusion ket para iti Article II ti Articles of Impeachment maiang ti maipagarup a saan a mailawlawag a kinabaknang ni Vice President Sara Duterte a saanna nga indeklarar iti Statement of Assets, Liabilities and Net Worth (SALN).
Kuna met ni House Trial Spokesperson Zia Alonto Adiong a “by virtue of marriage” ket agbalin a maymaysa a tao ni Duterte ken Carpio.
