LAOAG CITY – Inbatad ni Lt. Col. Ericson Bulosan, ti Commanding Officer ti 95th Infantry Batallion iti Philippine Army a no awan ti tulong dagiti umili ket nalidem a magun-od da ti nabayag da a tartarigagayan da, ti panagbalin nga insurgency free ti probinsya ti Isabela.
Segun ken ni Bulosan, maragsakan da gapu ta naan-anayen a nagbalin kas insurgency free ti Isabela, a kadagiti naglabas a tawen ket naruay dagiti napaspasamak a kinadamsak babaen kadagiti kameng ti Communist Party of the Philippines-New People’s Army (CPP-NPA).
Inlawlawag ni Bulosan nga idi paylaeng napalabas a tawen a rinugyan da nga inproseso dagiti kasapulan tapno maideklarar kas insurgency free ti Isabela.
Kuna na a dagiti kasapulan a requirements ket masapol nga iti uneg ti agarop maysa a tawen ket awan ti mamonitor a garaw wenno aktibidad dagiti rebelde a grupo, awan ti atrocities ken mapasamak a kinadamsak iti maysa a lugar.
Mainaig iti daytoy, inpasingked ni Bulosan a kalpasan a naideklarar kas insurgency free iti probinsya ti Isabela ket itultuloy da latta ti mangipaay ti tulong kadagiti umili.
Kabayatanna, inpakaammo ni Bulosan a ti kaudian a simmuko iti gobierno sakbay a naideklarar kas insurgency free iti probinsya ti Isabela ket dagiti agasawa a rebelde nga isuda alyas Baylon ken Mulan a dagitoy ket taga Cagayan ken Divilacan, Isabela.
