LAOAG CITY – Nakadepende iti Department of Justice (DOJ) no pagbalinen nga state witness ni dati nga House Speaker Martin Romualdez.
Inbatad ni Palace Press Officer USec. Claire Castro a nakadepende daytoy iti agbalin a salaysay ti dati nga House Speaker ken ti Department of Justice ti mangirekomendar iti korte no daytoy ket kualipikado nga agbalin nga state witness.
Iti agdama ket saan pay a masinunuo ti Malakanyang no daytoy ket mabalin nga state witness wenno saan.
Maipalagip a simmango ni Romualdez iti Independent Commission for Infrastructure ken nagkari a makitinnulong iti imbestigasion mainaig iti flood control fund mess.
Iti baet saan daytoy a karaman iti bicameral conference committee, rimmuar ti posibilidad nga isuna ket agbalin nga state witness.
Inpetteng ni Romualdez a ti panagatendarna iti Independent Commission for Infrastructure ket paset ti takderna iti transparency ken accountability ken kalikagumna a makatulong iti napaspas ken patas nga imbestigasion.
