LAOAG CITY – Agbalin a libre ti panagbayad iti panagupa ti stalls kadagiti naapektaran ti uram iti Batac City Public Market agingga iti katapusan ti 2026.
Segun ken ni Vice Mayor Albert Chua iti siudad ti Batac, manipud idi nagsubli dagiti stall owners nga aglako iti umuna ken maikadua a kadsaaran ti merkado publiko kalpasan ti napasamak nga uram ket awan ti bayadanda sadinno man ti puestoda iti agdama.
Malaksid iti daytoy, inbatadna nga awan met ti bayadan dagiti maseknan a biktima ti uram iti garbage fee agingga nga agngudo ita a tawen.
Inlawlawagna nga awan ti maipataw a pannusa wenno mainayon a bayadan iti business permit fee ngem maiyalud-od laeng ti panagbayad dagiti naapektaran ti uram a manipud idi Hulio 20 ket mapagbalin daytoy nga inton Disiembre 20 kas maibasar iti ordinansa a naaprobaran iti maikadua a pannakaibasana ken naipadalan iti public hearing.
Gapu iti daytoy, kunana a manamnama a bumaba ti gross sales ti merkado publiko inton panaglilisensia inton 2027 gapu ta saan a nagoperar dagiti aglaklako iti sumagmamano a bulan.
Innayonna nga umabot iti agarup 3 agingga 4.2 million pesos ti mapukaw a koleksion iti rental fee iti las-ud ti innem a bulan idinto nga agarup maysa agingga dua a milyon a pisos met ti maitantan a pannakasingir iti business pemit fee.
Naammoan nga adda ti sumurok 130 nga stalls ti naminpinsan a nadadael kalpasan ti pannakauram ti nasao a tiendaan.
Maipalagip nga inpakaammo ni Fire Superintendent Roxanne Parado, Provincial Fire Marshal a nangrugi ti uram kadagiti wirings ti kuryente ken mapatta-patta nga umabot iti 129 milyon a pisos ti balor dagiti nadadael a goods, appliances ken valuable items dagiti store owners idinto nga agarup 161 milyon a pisos met ti balor dagiti pasdek a nadadael.
Immuna iti daytoy, naideklarar nga state of calamity iti siudad ti Batac kalpasan a nauram ti tiendaan.
