LAOAG CITY – Maiwayat ti public hearing a pakipartisiparan dagiti aglaklako ken agtagikua ti pasdek negosyo a mangididiaya ti food products ditoy ciudad ti Laoag intono Abril 15 ita a tawen.

Daytoy ket kalpasan a naidasar ti maysa nga ordinansa nga agkalikagum a mangikeddeng ti renta kadagiti mausar a gamit iti panaglako ti Aurora Park.

Segun iti chairman ti Committee  on Laws, daytoy ti kalikagum da tapno maisardengen ti agwarwaras a damag nga adda dagiti agkolkolektar ti rental fees iti baet a naiget a maipawil daytoy.

Inlwlawag na a nakaipalaon iti nasao nga ordinansa a dagiti laeng mapalubosan nga aglako iti Aurora Park no adda dagiti aktibidad ket dagiti agrenta ti tent, tugaw ken lamisaan manipod iti gobierno lokal ditoy ciudad saak ketdi a ti space ti marentaan.

Mainaig iti daytoy, kunana a kasapulan nga aginvest ti gobierno lokal ditoy ciudad kadagiti tent, tugaw ken lamisaan tapno napinpintas ken naur-urnos a kitaen dagiti aglaklako.

Inpakaammo ti konseho a no adda dagiti agkalikagum nga agaplikar ket agturong da laeng iti Business Permit and Licensing Office, Accounting Office ken Tourism Office.