LAOAG CITY – Inpasingked ti Philippine National Police (PNP) nga awan ti napasamak a foul play iti pannakatay ti maysa a lakay iti Barangay 17, San Felipe idiay ili ti Sarrat.
Nabigbig daytoy a ni Maximo Baltazar y Calabucal, agtawen 71, balo ken residente iti Barangay 10, San Miguel iti nasao nga ili.
Immuna ti daytoy, nagreport ni John Patrick Ramos iti PNP kalpasan a nakita na ti nakabitin a bangkay ti biktima iti maysa a kayo ti mangga iti kataltalunan a paset iti Barangay 17 iti ili a Sarrat.
Segun ken ni Police Chief Inspector Joseph Baltazar, ti chief of police iti ili a Sarrat, dagus da a nagturong iti lugar kalpasan a naipakaammo kadakuada ti napasamak.
Iti panangeksamen ni Doctor Jennifer Bueno Valdez ti bangkay ti biktima ket kinumpirmaran na a natay daytoy gapu ti panagbekkel na.
Naamoan a ti nasao a biktima ket agmaymaysan nga agbibiag ken rumrumuar nga agsagsagaba ti nakaro a depresyon.
