LAOAG CITY – Agtalek ni Department of the Interior and Local Government (DILG) Secretary Benhur Abalos a mabalin a mapasardeng ti umad-adu a kaso seknan iti panagtakaw ti motorsiklo ditoy pagilian.
Daytoy ti inpablaak na kalpasan a nagpirma ti Philippine National Police (PNP) ken Land Transportation Office (LTO) iti katulagan mainaig iti panagtitinnulong da iti Information and Communications Technology (ICT) Systems.
Segun ken ni Secretary Abalos, nasken ti panagtitinnulong iti nagbaetan ti Philippine National Police (PNP) ken Land Transportation Office, nangruna ita ta umaboten iti 30,000 iti kada tawen ti bilang dagiti kaso ti panagtakaw iti motorsiklo iti intero a pagilian.
Mangnamnama ti sekretario a naparpartak a maammuan dagiti mangimatmaton no natakaw wenno saan ti motorsiklo, gapu ta naparpartak met a makaaramidda iti maitutop nga addang.
Inpakaammo ni Secretary Abalos a babaen ti panagtitinnulong ti PNP-Highway Patrol Group wenno HPG ket ma-verify ken ma-access ti rekord dagiti motorsiklo nga agdama a maimbestigaran wenno maalerto nga insigida ti Information and Communications Technology system ti Land Transportation Office.
Pinasingkedan pay ni Abalos a maysa a police officer manipud iti PNP-Highway Patrol Group ti maidestino iti Land Transportation Office Command Center tapno mapaalisto ti verification dagiti kasapulan nga impormasyon.
