LAOAG CITY – Inpakaamo ni PLt. Col. Rafael Lero, chief of police ti PNP Laoag nga adda ti schedule iti kada barangay ditoy siudad a mapan agbisita iti kamposanto.
Daytoy ket kas addang tapno maliklikan ti panagdudupodop ti ado a tattao.
Inbatad na a babaen ti pannakitaripong na kadagiti kapitan ditoy siudad ket napagnunumoan nga adda ti clusterized schedule dagiti barangay para iti panagbisita iti kampusanto.
Kuna na nga iti aldaw a malukatanen ti kamposanto kadagiti agbisita ket naiget a maipatungpal dagiti health protocols nu sadino a manipod alas syete iti bigat agingga iti alas syete ti rabii laeng ti oras ti panagbisita.
Inpagunam-gunam na a masurot ti no face mask no entry policy ken saan a mapalubusan a sumrek dagiti adda iti tugot na nga arak, deadly weapon ken papputok.
Inbagana pay a liklikan ti agitugot kadagiti ubbing ken nataengan.
Innayun ni Lero a nasken nga adda ipakita dagiti agturong iti kampusanto nga ID a mangpaneknek a residente dagitoy iti bukod da a barangay ditoy siudad.
Mainaig iti daytoy, inpakaamo na a manamnama nga agtataripnong da iti Department of Public Safety, City Health Office (CHO) pakairamanan ti Search and Rescue team ditoy siudad para iti pannakaipinal dagiti maaramid nga addang kabayatan ti panaglukat ti kampusanto kadagit agbisita.
Immunan nga inparuk-at ti Inter-Agency Task Force for The Management of Emerging Infectious Diseases a mabalinen ti agbisita iti kamposanto ngem nasken a masurot dagiti minimum health protocols ken mairikep daytoy ituno Oktubre 29 agingga iti Nobiembre 4.
