LAOAG CITY – Nagtalinaed a problema ti lokal a gobierno ditoy siudad ti Laoag dagiti badjao nga agbitin kadagiti Public Utility Jeepney.
Segun ken ni Mrs. Perlita Cabello, mangidadaulo ti City Social Welfare and Development Office, naiget ti pannakikoordinarda kadagiti nagduduma a pangopisinaan ti City ken Municipal Social Welfare and Development Office maipanggep iti daytoy a banag.
Malaksid iti daytoy, kunana a nakikoordinarda pay iti Philippine National Police ken City wenno Municipal Disaster Risk Reduction and Management Office tapno mabagbagaan dagiti maseknan a badjao.
Inadmitirna a saan a kabaelan a masolbar ti lokal a gobierno ditoy siudad ti Laoag pakairamanan dagiti dadduma pay a Local Government Units ti nasao a parikot no awan ti tulong ti gobierno probinsial.
Inlawlawagna nga awan ti pinal a datos maipanggep iti pakabuklan a bilang dagiti badjao nga agturturong ditoy siudad ti Laoag gapu ta rummuar sumrek met dagitoy.
Innayonna a kurang ti pundo ti opisinada gapu ta maus-usar daytoy para kadagiti badjao nga imbes kadagiti umili ditoy siudad ti Laoag.
