LAOAG CITY – Inpakaammo ni Mr. Ray Christian Dela Cruz a taga siudad ti Batac a ti panagbuya kadagiti social media ti nakaalaanna ti ideya iti panaglako ti chicken pastil.
Segun kenkuana, adu dagiti mabuybuyana a padana nga estudiante ti addaan ti kabukbukudan a diskarte iti panagbiag nangruna iti wagas no kasanoda a masupusupan dagiti kasapulanda iti panagadal.
Inadmtirna a saan nga ang-angaw ti agadal iti kolehio nangruna ket agdama a mangal-ala daytoy iti kurso a Veterinary Medicine.
Inlawlawagna a kasapulanna ti nayon a pamastrek tapno adda ti pagkautanna no adda dagiti dakkel a gatad a bayadanna iti klase wenno pagadalan.
Gapu iti daytoy, kunana a babaen iti tulong ti moderno a teknolohia ket nakapidot daytoy ti ideya a mabalin nga aramidenna a pangsupusop kadagiti paggastoanna iti panagbasa kas ti panaglako ti chicken pastil.
Inbatadna a narigat nga ibalanse ti oras iti panagadal ken ti panaglako iti daytoy ngem gapu iti gagarna a makatulong iti nagannakna a makissayan dagiti gastosenna ket ikarkarigatanna a mailako amin dagitoy.
Innayonna nga agbalin koma daytoy a pagsarmingan kadagiti padana nga estudiante a saan nga ibain ti panaglako ti aniaman a banag wenno produkto laketdi daytoy ket saan a dakes ken awan ti maperwisyo a sabali a tao.
