LAOAG CITY – Kinataripnong ni Mayor Aldrin Garvida iti ili ti Nueva Era dagiti opisyal ti barangay, health officials ken dadduma pay seknan iti estado pagilian iti coronavirus disease (Covid-19).
Daytoy ket kalpasan a kinataripnong ni Presidente Rodrigo Roa Duterte dagiti mayor iti intero a pagilian seknan ti nasoa a virus idi rabii.
Kuna na kadagiti maseknan a kinadalus ti aglawlaw ken ti bagbagi ti kangrunaan a kasapulan ti anag ti nagbalin a taripnong.
Inbatad ni Garvida a disiplina ti bagbagi ken iti kumunidad ti kasapulan tapno makaliklik iti anyaman a sakit.
Inlawlawag na a nalimitaran iti panagala kadagiti exotic kas iti alingo ken ugsa gapu ti linteg.
Innayon ni Garvida a maibasar iti linteg ti panagala kadagiti nasao nga ayop no adda laeng iti okasyon kas paset ti tradisyon ken maipawil iti aganup kadagiti nasao nga ayop no mailako iti merkado.
Maipalagip a nangrugi ti coronavirus disease (Covid-19) iti exotic food a nakan ti chinese idiay Wuhan City, China.
Iti mainaig a damag, inrakurak ni Mayor Alfredo Valdez iti ili ti San Nicolas iti umuna nga addang da seknan iti panangliklik ti Covid-19.
Kuna na a ti panagukkon ti impormasyon ken panangiparuk-at dagiti pakaammo ti umuna nga ubraen da gapu ta awan pay ti kaso ti nasao a virus.
Daytoy ket gapu ta adu dagiti agturturong a bisita ken pakasaranan ti chinese consulate.
Kinumpirmaran na nga adda ti pammilin kadagiti kameng ti Chinese Consulate ti panagusar da ti face mask.
Mainaig iti daytoy, adda ti nabuangay a task force corona virus a pakaibilangan ti PNP, MMMH&MC, rural health unit, pagadalan ken committee on health.
Inbatad ni Valdez nga ikampampanya da ti umiso a panagbuggo ti ima ken panangliklik kadagiti paggaaduan ti tao.
Innayon na a naibilin nga adda ti task force iti kada LGU.
Kamaudian na, awan ti maitulong ti fake news a maiwarwaras iti publiko seknan Covid-19.
Daytoy ti reaksiyon ni Mayor Alfredo Valdez iti ili ti San Nicolas.
Kuna na nga awan ti kaso ti nCoV ditoy probinsya.
Innayon ni Valdez nga adda dagiti eksperto ditoy siudad ti Laoag a mangimpormar mainaig ti Covid-19.
